Borgarruller

Frå 1500-talet og fram til kring midten av 1800-talet, skulle handels- og handverksverksemd berre drivast i byane, og der berre av dei som hadde status som borgarar. Eit slikt borgarskap medførte at ein fekk del i privilegia i byen som vedkom borgarane, samstundes som ein også måtte påta seg plikter for fellesskapet.

Borgarskap fekk ein ved at ein gjorde eid til kongen og til styresmaktene i byen, og betalte ei avgift til bykassen. Når dette vart gjort vart dei nye borgarane førte inn i protokollar slik at styresmaktene kunne ha oversikt over borgarane i byen.

Somme stader vart borgarane førte i den vanlege rettsprotokollen, medan andre byar hadde eigne protokollar eller ruller for borgarane. Dei som tok borgarskap fekk eit borgarbrev som skriftleg vitnemål på at dei var borgarar av byen.