Kyrkjebøker

Ei kyrkjebok er ein protokoll der opplysningar om dei kyrkjelege handlingane presten utfører vert førte. I tillegg til dette vil kyrkjebøkene i periodar innehalda opplysningar om tiltak som prestane har vore pålagde å halda kontroll med, som det å føra attestar over inn- og utflytta og lister over vaksinerte.

Til å byrje med var det alltid presten som skulle føra kyrkjebøkene, men i 1812 kom det påbod om at klokkarane skulle føra duplikatkopiar av presten si bok. Både dei protokollane presten førte (ofte kalla ministerialbøker) og dei som klokkaren førte (klokkarbøker) går under nemninga kyrkjebøker.

Kyrkjebøkene er i utgangspunktet klausulerte for innsyn i 60 år. Listene over døypte frå 1930 og seinare må likevel kontrollerast for opplysningar om adopsjon før dei kan leverast ut til publikum. Digitalarkivet kan ikkje leggja ut søkbare opplysningar om levande personar, og opererer derfor med strengare grenser.

Per dags dato legg me ut opplysningar om:

• døypte til 1915
• konfirmerte til 1930
• vigde til idag, men med avgrensa informasjon på nyare vigslar
• dødslistene kan leggjast ut heilt fram til i dag, men sensitive opplysningar (opplysningar om helse, religiøse forhold, økonomi, adopsjon etc.) vert fjerna før utlegging.

Desse grensene gjeld for databasane i Digitalarkivet. Dei vert flytta kvart femte år.

Skanna kyrkjebøker har ikkje så strenge grenser:

• lister over fødde og døypte går fram til 1930
• konfirmasjonslister til 1935
• lister over vigde, trulova og lysinga til 2005
• lister over døde, gravlagde og dødfødde til 1929
• lister over døde og gravlagde utan utfylt dødsårsak 2005
• inn- og utflytta til 2005
• inn- og utmelde frå statskyrkja til 1949
• lister vedkommande dissentarar går fram til 1949

Merk at dei skanne kyrkjebøkene er førebels ikkje tilgjengeleg frå Databaseveljaren. Klikk på Skanna kyrkjebøker i den horisontale menyen for å sjå eit eige søkjebilete for desse bøkene.

Les meir
Kirkebøker (ministerialbøker)